ຂ່າວການເຄື່ອນໄຫວຂອງສະຖານທູດ

ທ່ານ ແສງ ສຸຂະທິວົງ, ເອກອັກຄະລັດຖະທູດ ແຫ່ງ ສປປ ລາວ ປະຈໍາຣາຊະອານາຈັກໄທ ແລະ ຄະນະ ໄດ້ເຂົ້າຢ້ຽມຄໍານັບ ທ່ານ ພົນຕໍາຫຼວດເອກ ອັດຊະວິນ ຂວັນເມືອງ, ຜູ້ວ່າຣາຊະການກຸງເທບມະຫານະຄອນ

ການເຂົ້າຢ້ຽມຄໍານັບ ແລະ ພົບປະກັບ ທ່ານ ພົນຕໍາຫຼວດເອກ ອັດຊະວິນ ຂວັນເມືອງ, ຜູ້ວ່າຣາຊະການກຸງເທບມະຫານະຄອນ ໃນວັນທີ 20 ທັນວາ 2018 ທີ່ ນໍານັກງານຜູ້ວ່າຣາຊະການກຸງເທບມະຫານະຄອນ (ຫຼັງໃໝ່) ເຂດດິນແດງ.
ໃນຕອນບ່າຍຂອງວັນທີ 20 ທັນວາ 2018, ທີ່ສໍານັກງານຜູ້ວ່າຣາຊະການກຸງເທບມະຫານະຄອນຫຼັງໃໝ່ ເຂດດິນແດງ, ທ່ານ ແສງ ສຸຂະທິວົງ, ເອກອັກຄະລັດຖະທູດ ແຫ່ງ ສປປ ລາວ ປະຈໍາຣາຊະອານາຈັກໄທ ແລະ ຄະນະ ໄດ້ເຂົ້າຢ້ຽມຄໍານັບ ທ່ານ ພົນຕໍາຫຼວດເອກ ອັດຊະວິນ ຂວັນເມືອງ, ຜູ້ວ່າຣາຊະການກຸງເທບມະຫານະຄອນ ພາຍຫຼັງທີ່ໄດ້ມີການຢືນສານຕາຕັ້ງຕໍ່ ສົມເດັດພະເຈົ້າມະຫາຊີວິດ ຣາຊະການທີ 10. ສອງຝ່າຍໄດ້ມີການແລກປ່ຽນຄວາມຄິດເຫັນລະຫວ່າງກັນກ່ຽວກັບການພົວພັນ ແລະ ຮ່ວມມືລະຫວ່າງສອງປະເທດ ລາວ ແລະ ໄທ ໂດຍສະເພາະການສືບຕໍ່ເສີມຂະຫຍາຍການຮ່ວມມືລະຫວ່າງສອງນະຄອນຫຼວງດ້ວຍກັນ ກໍຄືລະຫວ່າງນະຄອນຫຼວງວຽງຈັນ ແລະ ກຸງເທບມະຫານະຄອນ ໃຫ້ຂະຫຍາຍຕົວສູງຂຶ້ນໃນຊຸມປີຕໍ່ໜ້າ. ໃນໂອກາດນີ້, ສະຖານເອກອັກຄະລັດຖະທູດ ແລະ ສໍານັກງານຜູ້ວ່າຣາຊະການກຸງເທບມະຫານະຄອນ ໄດ້ຮ່ວມຫຼີ້ນກິລາບານເຕະມິດຕະພາບ ເພື່ອຮັດແໜ້ນສາຍພົວພັນ ແລະ ການຮ່ວມມືລະຫວ່າງສະຖານທູດ ແລະ ສໍານັກງານຜູ້ວ່າຣາຊະການກຸງເທບມະຫານນະຄອນ ດ້ວຍບັນຍາກາດເບີກບານ ມ່ວນຊື່ນ.

ພະນະທ່ານ ແສງ ສຸຂະທິວົງ ເຂົ້າຍື່ນສານຕາຕັ້ງແດ່ ສົມເດັດພະເຈົ້າຢູ່ຫົວ ມະຫາວະຊິຣາລົງກອນ ບໍດິນທະຣະເທບ ພະບໍວະຣາງກຸນ ເພື່ອດຳລົງຕຳແໜ່ງ ເປັນເອກອັກຄະລັດຖະທູດ ວິສາມັນຜູ້ມີອຳນາດເຕັມ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ປະຈຳຣາຊະອານາຈັກໄທ ໃນຄັ້ງວັນທີ 07 ທັນວາ 2018.

ໃນຕອນບ່າຍຂອງວັນທີ 7 ທັນວາ 2018, ທ່ານ ແສງ ສຸຂະທິວົງ ໄດ້ເຂົ້າຍື່ນສານຕາຕັ້ງຕໍ່ ສົມເດັດພະເຈົ້າຢູ່ຫົວ ມະຫາວະຊິຣາລົງກອນ ບໍດິນທະຣະເທບພະຍະວະຣາງກູນ, ພະມະຫາກະສັດ ແຫ່ງ ຣາຊະອານາຈັກໄທ ເພື່ອດຳລົງຕຳແໜ່ງເປັນເອກອັກຄະລັດຖະທູດວິສາມັນ ຜູ້ມີອຳນາດເຕັມ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ປະຈຳ ຣາຊະອານາຈັກໄທ ໂດຍມີສຳນັກງານຕັ້ງຢູ່ນະຄອນຫຼວງບາງກອກ.

ໃນໂອກາດເຂົ້າຍື່ນສານຕາຕັ້ງຕໍ່ ສົມເດັດພະເຈົ້າຢູ່ຫົວ ຣາຊະການທີ 10, ທ່ານ ແສງ ສຸຂະທິວົງ ໄດ້ກ່າວສະແດງຄວາມພາກພູມໃຈ ແລະ ຖືເປັນກຽດຢ່າງສູງ ທີ່ໄດ້ຮັບການແຕ່ງຕັ້ງໃຫ້ດຳລົງຕຳແໜ່ງ ເປັນເອກອັກຄະລັດຖະທູດວິສາມັນ ຜູ້ມີອຳນາດເຕັມ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ປະຈຳຣາຊະອານາຈັກໄທ, ເຊິ່ງເປັນປະເທດບ້ານໃກ້ເຮືອນຄຽງ ທີ່ມີຮີດຄອງປະເພນີ, ວັດທະນະທຳ, ພາສາ ແລະ ການດຳລົງຊີວິດທີ່ຄ້າຍຄືກັນ. ໃນໂອກາດດັ່ງກ່າວ, ທ່ານ ເອກອັກຄະລັດຖະທູດລາວ ໄດ້ນໍາເອົາຄວາມຢື້ຢາມຖາມຂ່າວອັນອົບອຸ່ນ ແລະ ພອນໄຊອັນປະເສີດຂອງ ພະນະທ່ານ ບຸນຍັງ ວໍລະຈິດ, ປະທານປະເທດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ແລະ ພັນລະຍາ ທີ່ສົ່ງເຖິງ ສົມເດັດພະເຈົ້າຢູ່ຫົວ ມະຫາວະຊິຣາລົງກອນ ບໍດິນທະຣະເທບ ພະຍະວະຣາງກູນ ແລະ ພະບໍຣົມວົງສານຸວົງທຸກພະອົງ ຈົ່ງມີສຸຂະພາບເຂັ້ມແຂງ ແລະ ມີພະລານາໄມສົມບູນຍິ່ງຍືນນານ.

ສົມເດັດພະເຈົ້າຢູ່ຫົວ ມະຫາວະຊິຣາລົງກອນ ບໍດິນທະຣະເທບພະຍະວະຣາງກູນ ໄດ້ກ່າວສະແດງຄວາມຍິນດີຕ້ອນຮັບ ທ່ານ ເອກອັກຄະລັດຖະທູດ ແສງ ສຸຂະທິວົງ, ສະແດງຄວາມອົກຂອບໃຈຕໍ່ຄຳອວຍພອນອັນອົບອຸ່ນ ແລະ ຄວາມປາຖະໜາດີຂອງ ພະນະທ່ານ ປະທານປະເທດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ; ແລະ ຝາກຄວາມຢື້ຢາມຖາມຂ່າວອັນອົບອຸ່ນ ແລະ ພອນໄຊອັນປະເສີດມາຍັງ ພະນະທ່ານປະທານປະເທດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ຈົ່ງພະລານາໄມຍິ່ງຍືນນານ. ຂໍໃຫ້ປະເທດລາວ ແລະ ປວງຊົນຊາວລາວ ຈົ່ງມີແຕ່ຄວາມສຸກຄວາມຈະເລີນ. ໄທ ແລະ ລາວ ເປັນເພື່ອນບ້ານໃກ້ຄຽງ ແລະ ສາມາດໄປມາຫາສູ່ກັນໄດ້ສະດວກສະບາຍ ແລະ ອວຍພອນໃຫ້ທ່ານທູດລາວປະຕິບັດໜ້າທີ່ ດ້ວຍຄວາມສະບາຍໃຈຕະຫຼອດໄລຍະເວລາທີ່ດຳລົງຕຳແໜ່ງຢູ່ໃນປະເທດໄທ ໂດຍສົມເດັດ ແລະ ທາງການໄທຈະໃຫ້ການສະໜັບສະໜູນ ແລະ ການຮ່ວມມືຊ່ວຍເຫຼືອຢ່າງເຕັມທີ່.

ໃນຖານະເອກອັກຄະລັດຖະທູດ ແຫ່ງສາທາລະນະລັດ ປະຊາທິປະໄຕ ປະຊາຊົນລາວ ປະຈຳ ຣາຊະອານາຈັກໄທ, ທ່ານ ແສງ ສຸຂະທິວົງ ໄດ້ຢືນຢັນວ່າຈະທຸ່ມເທທຸກຄວາມພະຍາຍາມ ແລະ ຈະປະຕິ ບັດໜ້າທີ່ຈົນຄວາມສາມາດຂອງຕົນ ເພື່ອສືບຕໍ່ສົ່ງເສີມສາຍພົວພັນມິດຕະພາບ ແລະ ການຮ່ວມມືອັນດີງາມລະຫວ່າງສອງປະເທດທີ່ມີມາແລ້ວນັ້ນ ໃຫ້ມີການຂະຫຍາຍຕົວ ແລະ ນຳເອົາຜົນປະໂຫຍດຕົວຈິງມາສູ່ສອງປະເທດ ແລະ ປະຊາຊົນສອງຊາດລາວ ແລະ ໄທ ເພີ່ມສູງຂຶ້ນເລື້ອຍໆ.

ສະຖານເອກອັກຄະລັດທູດ ສປປ ລາວ ປະຈໍາປະເທດໄທ ສະເຫລີມສະຫລອງວັນຊາດ 2 ທັນວາ ຄົບຮອບ 43 ປີ

ຕອນຄໍ່າຂອງວັນທີ 30 ພະຈິກ 2018 ທີ່ຜ່ານມານີ້, ສະຖານເອກອັກຄະລັດຖະທູດແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ (ສປປ ລາວ) ປະຈໍາຣາຊະອານາຈັກໄທ ທີ່ບາງກອກ ໄດ້ຈັດພິທີສະເຫຼີມສະຫຼອງວັນຊາດ 2 ທັນວາ, ຄົບຮອບ 43 ປີ ຂຶ້ນຢ່າງຄຶກຄື້ນ, ເຕັມໄປດ້ວຍເນື້ອໃນ ແລະ ຄວາມໝາຍ ອັນເລິກເຊິ່ງ ໂດຍການເປັນປະ ທານຂອງທ່ານ ແສງ ສຸຂະທາວົງ, ເອກອັກຄະລັດຖະທູດ ແຫ່ງ ສ ປ ປ ລາວ ປະຈໍາຣາຊະອານາຈັກໄທ, ມີພະນັກງານສະຖານທູດ, ແຂກທີ່ມີກຽດທັງຊາວໄທ-ລາວ ຕະຫລອດຮອດພີ່ນ້ອງຄົນໄທເຊື້ອສາຍລາວ ເຂົ້າຮ່ວມ 300 ກວ່າຄົນ.
ບາງຕອນທີ່ສຳຄັນຂອງ ທ່ານເອກອັກຄະລັດຖະທູດ ແສງ ສຸຂະທິວົງ ໄດ້ຍົກໃຫ້ເຫັນຄວາມໝາຍຄວາມສໍາຄັນຂອງວັນຊາດ 2 ທັນວາ; ຕະຫລອດໄລຍະ 43 ປີຜ່ານມາ, ພາຍໃຕ້ການນໍາພາຂອງພັກປະຊາຊົນ ປະ ຕິວັດລາວ; ລັດຖະບານ ແລະ ປະຊາຊົນລາວ ໄດ້ສຸມໃສ່ປະຕິບັດສອງໜ້າທີ່ຍຸດທະສາດຄື ການປົກປັກຮັກສາ ແລະ ສ້າງສາພັດທະນາປະເທດຊາດອັນໄດ້ຮັບຜົນສໍາເລັດເປັນກ້າວໆຜ່ານມາ. ພ້ອມນີ້ກໍ່ໄດ້ຍົກໃຫ້ເຫັນຜົນສໍາເລັດທີ່ພົ້ນເດັ່ນໃນບາງດ້ານ, ຕະຫລອດ 1 ປີຜ່ານມາໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 5 ປີຄັ້ງ 8.
ທ່ານ ໄດ້ກ່າວເຖິງຄວາມສໍາພັນ ລາວ-ໄທ ສໍາຄັນຕອນໜຶ່ງວ່າ ສາທາລະນະລັດ ປະຊາທິປະໄຕ ປະຊາຊົນລາວ ແລະ ຣາຊະອານາຈັກໄທ ໄດ້ສ້າງຕັ້ງສາຍພົວພັນທາງການທູດນຳກັນໃນວັນທີ 19 ທັນວາ 1950. ນັບແຕ່ເວລານັ້ນເປັນຕົ້ນມາ, ສາຍພົວພັນມິດຕະພາບ ແລະ ການຮ່ວມມື ລະຫວ່າງສອງປະເທດ, ເຊິ່ງເປັນບ້ານໃກ້ເຮືອນຄຽງ ທີ່ມີເສັ້ນຊາຍແເດນຕິດຈອດກັນ ທັງທາງບົກ, ທາງນໍ້າ ແລະ ທາງອາກາດ, ມີຮີດຄອງປະເພນີ, ວັດທະນະທຳ, ພາສາ, ສາດສະໜາ ແລະ ວິຖີຊີວິດຄ້າຍຄືກັນມາແຕ່ບູຮານນະການນັ້ນ ໄດ້ມີການຂະຫຍາຍຕົວຢ່າງຕໍ່ເນື່ອງ ໂດຍສອງຝ່າຍໄດ້ແລກປ່ຽນການຢ້ຽມຢາມສັນຖະວະໄມຕີຊຶ່ງກັນແລະກັນ ໃນລະດັບປະມຸກລັດ, ສະພາແຫ່ງຊາດ, ລັດຖະບານ, ນັກທຸລະກິດ ແລະ ປະຊາຊົນກັບປະຊາຊົນ. ນອກຈາກນັ້ນ ທັງສອງປະເທດຍັງມີກົນໄກການຮ່ວມມືສອງຝ່າຍເຊັ່ນ: ຄະນະກຳມາທິການວ່າດ້ວຍການຮ່ວມມືລາວ-ໄທ, ຄະນະກຳມາທິການຮ່ວມມືຮັກສາຄວາມສະຫງົບຮຽບຮ້ອຍຕາມຊາຍແດນທົ່ວໄປ ລາວ-ໄທ, ຄະນະກຳມາທິການຊາຍແດນຮ່ວມ ລາວ -ໄທ, ການພົບປະລະຫວ່າງແຂວງ-ຈັງຫວັດຊາຍແດນ ລາວ-ໄທ, ການພົບປະບໍ່ເປັນທາງການຂອງລັດຖະບານ ລາວ-ໄທ, ສະມາຄົມ ລາວ-ໄທ ແລະ ໄທ-ລາວ ເພື່ອມິດຕະພາບ. ພ້ອມດຽວກັນນັ້ນ ກໍໄດ້ມີການໄປ-ມາຫາສູ່ກັນ ລະຫວ່າງປະຊາຊົນຕາມແນວຊາຍແດນຂອງທັງສອງປະເທດ ເພື່ອຮ່ວມກັນສະຫຼອງບຸນປະເພນີ, ງານວັດທະນະທຳ, ງານທອດກະຖິນ, ຜ້າປ່າສາມັກຄີ ແລະ ກິດຈະກຳອື່ນໆ, ເຊິ່ງທັງໝົດນີ້ ໄດ້ເປັນການປະກອບສ່ວນທີ່ສຳຄັນເຂົ້າໃນການເສີມສ້າງສາຍພົວພັນມິດຕະພາບອັນດີງາມທີ່ມີມາແລ້ວນັ້ນ ໃຫ້ແໜ້ນແຟ້ນຍິ່ງໆຂຶ້ນທັງໃນຮູບການສັງຄົມ ແລະ ການສ້າງສາພັດທະນາປະເທດ.
ທ່ານ ກ່າວວ່າ: ເຖິງປີ 2018 ນີ້, ການລົງທຶນຂອງໄທຢູ່ ສປປ ລາວ ມີທັງໝົດ 672 ໂຄງການ ຮວມມູນຄ່າ 6.3 ຕື້ໂດລາ ສະຫະລັດ; ສະເພາະ 6 ເດືອນຕົ້ນປີ 2018 ມີມູນຄ່າ 287.1 ລ້ານໂດລາ ສະຫະລັດ. ສຳລັບການຄ້າສອງຝ່າຍມີມູນຄ່າ 6.2 ຕື້ໂດລາ ສະຫະລັດ. ປັດຈຸບັນ ລະຫວ່າງສອງປະເທດ ລາວ ແລະ ໄທ ມີຂົວມິດຕະພາບແລ້ວ 4 ແຫ່ງ ແລະ ມີແຜນຈະສ້າງຕື່ມອີກ 2 ແຫ່ງ.
ໃນໂອກາດນີ້, ທ່ານ ເອກອັກຄະລັດຖະທູດແຫ່ງ ສປປ ລາວ ຍັງໄດ້ຕ່າງໜ້າໃຫ້ລັດຖະບານ ແລະ ປະຊາຊົນລາວ ສະແດງຄວາມຮູ້ບຸນຄຸນຕໍ່ ພະບໍຣົມມະຫາຣາຊະວັງ, ລັດຖະບານ, ສະພານິຕິບັນຍັດ, ບັນດາບໍລິສັດທຸລະກິດ, ສື່ມວນຊົນ, ນັກສິລະປິນ ແລະ ປວງຊົນຊາວໄທທຸກຖ້ວນໜ້າທີ່ໄດ້ສົ່ງພະລັງຈິດ, ກຳລັງໃຈ, ວັດຖຸ-ປັດໃຈ ແລະ ອື່ນໆ ເພື່ອປະກອບສ່ວນກັບລັດຖະບານ ສປປ ລາວ ຊ່ວຍກອບກູ້ ແລະ ຟື້ນຟູຊີວິດຈິດໃຈຂອງຊາວເມືອງສະ ໜາມໄຊ ທີ່ປະສົບກັບບັນຫາເຂື່ອນແຕກໃນທ້າຍເດືອນກໍລະກົດ 2018ໃຫ້ກັບຄືນມາດຳລົງຊີວິດຢູ່ໃນສັງຄົມຢ່າງເປັນປົກກະຕິຕໍ່ໄປ.
ໃນພິທີສະເຫລີມສະຫລອງວັນຊາດໃນປີນີ້ ຍັງໄດ້ຈັດໃຫ້ມີການສະແດງສິລະປະຂອງພະນັກງານສະຖານທູດ, ນັກສຶກສາລາວ ຮຽນຢູ່ປະເທດໄທ, ການປະກອບສ່ວນສະແດງຟ້ອນພື້ນເມືອງ, ຫມໍລໍາ ແລະ ຮ້ອງເພງຂອງພີ່ນ້ອງຄົນໄທເຊື້ອ ສາຍລາວ, ເຊັ່ນ: ໄຕຊົງດໍາ, ຊາວຜູ້ໄທໂລກ ແລະ ລາວຄັ່ງ, ຢ່າງມ່ວນຊື່ນ ເຊິ່ງເຕັມໄປດ້ວຍບັນຍາກາດແຫ່ງຄວາມສາມັກຄີດີງາມແຕ່ຕົ້ນຕະຫລອດປາຍ.